Í vetur höfum við verið að innleiða vinnu útfrá Barnasáttmálanum þar sem áhersla er lögð á það að gera börn meðvitaðri um réttindi sín og rödd sína.
12. gr. Barnasáttmálans hljómar upp á rétt barna til að láta skoðanir sínar í ljós og að hafa áhrif.
Útfrá vinnu á þessari grein fékk Fálkahópurinn (elsti árgangur) hugmynd að skrifa bréf til bæjarstjórans með óskir um bætt aðgengi að klósetti í Einkunnum þar sem það er læst á veturna, svo við gætum farið oftar þangað.
Einnig óskuðu fálkarnir eftir gangbraut við Skúlagötu og við tjaldstæðið í bréfinu.
Þórdís Sif bæjarstjóri tók vel á móti okkur þegar fálkarnir komu með bréfið og afhentu henni og tók vel í þessar óskir. Hún sá strax lausn á klósettmálunum í Einkunnum en gat engu lofað með gangbrautirnar.
Mikilvægt er að gera börn meðvituð um að þau geti haft áhrif með því að láta skoðanir sínar í ljós og að þau finni að það sé hlustað á þau. Með því eflist sjálfsmynd og sjálfstraust þeirra.